- 22 నుంచి 25 వరకు ఆరెంజ్ అలర్ట్
- 60 కిలోమీటర్ల వేగంతో గాలులు
హైదరాబాద్, వెలుగు: రాష్ట్రానికి వాతావరణ శాఖ హెచ్చరిక జారీ చేసింది. ఈనెల 22వ తేదీ నుంచి 25 వరకు భారీ వర్షాలు పడే అవకాశం ఉందని పేర్కొంది. ఈ మేరకు నాలుగు రోజులకు ఐఎండీ ఆరెంజ్అలర్ట్ జారీ చేసింది. 50 నుంచి 60 కిలోమీటర్ల వేగంతో తీవ్రమైన ఈదురుగాలులు వీస్తాయని వెల్లడించింది. 20, 21వ తేదీల్లోనూ భారీ వర్షాలు కురుస్తాయని పేర్కొన్న ఐఎండీ.. ఈ రెండు రోజులకు ఎల్లో అలర్ట్ను ఇష్యూ చేసింది. 30 నుంచి 40 కిలోమీటర్ల వేగంతో ఈదురుగాలులు వీస్తాయని తెలిపింది.
హైదరాబాద్ సిటీలోనూ ఈ వారం రోజులపాటు మోస్తరు నుంచి భారీ వర్షాలు కురిసే అవకాశం ఉందని, వాతావరణం మబ్బులు పట్టి ఉంటుందని ఐఎండీ వెల్లడించింది. అయితే, ఇన్నాళ్లూ వర్షాల్లేక ఎండల తీవ్రత, ఉక్కపోతతో సతమతమైన ప్రజలకు.. వర్షాలు కొంచెం ఊరటనిచ్చాయి. ఇటు పంటల తడి కోసం ఎదురు చూస్తున్న రైతులకు ఈ వర్షాలు కొంత మేలు చేయనున్నాయి.
సంగారెడ్డి జిల్లాలో అత్యధిక వర్షపాతం
రాష్ట్రంలోని పలు జిల్లాల్లో శనివారం మోస్తరు వర్షాలు పడ్డాయి. సంగారెడ్డి, రంగారెడ్డి, మహబూబ్నగర్, నాగర్కర్నూల్, నల్గొండ, యాదాద్రి భువనగిరి, మెదక్, వికారాబాద్, సిద్దిపేట, మెదక్, కామారెడ్డి, రాజన్నసిరిసిల్ల, జగిత్యాల, నిర్మల్, జనగామ, హనుమకొండ, కరీంనగర్, కుమ్రంభీం ఆసిఫాబాద్ జిల్లాల్లో వర్షాలు కురిశాయి. సంగారెడ్డి జిల్లా సత్వార్లో అత్యధికంగా 8 సెంటీమీటర్ల వర్షపాతం నమోదైంది. సిద్దిపేట జిల్లా చాట్లపల్లిలో 6.4 సెంటీమీటర్లు, రంగారెడ్డి జిల్లా హయత్ నగర్లో 6.3, ఎయిర్పోర్టు వద్ద 6, సిద్దిపేట జిల్లా మునిగడపలో 5.8, రంగారెడ్డి జిల్లా మాడ్గుల్లో 4.9, సంగారెడ్డి జిల్లా కామ్కోల్లో 4.8, ఆల్గోల్లో 4.8, నల్గొండ జిల్లా కొండమల్లేపల్లిలో 4.7, నాగర్కర్నూల్ జిల్లా ఉప్పునుంతలలో 4.5 సెంటీమీటర్ల చొప్పున వర్షపాతం నమోదైంది.
హైదరాబాద్లో దంచికొట్టిన వాన
హైదరాబాద్ సిటీలో వాన దంచికొట్టింది. శనివారం సాయంత్రం ఒక్కసారిగా వాతావరణం మారిపోయి భారీ వర్షం కురిసింది. హయత్నగర్లో 6.3 సెంటీమీటర్లు, ఎయిర్పోర్టు 6, శివరాంపల్లిలో 4.5, రాజేంద్రనగర్లో 4.5, మైలార్దేవ్పల్లిలో 4.1, తట్టిఅన్నారంలో 3.9, రాజేంద్రనగర్ జీహెచ్ఎంసీ సర్కిల్ ఆఫీస్ వద్ద 3.8, షేక్పేటలో 3.1, మధురానగర్లో 3.1 సెంటీమీటర్ల చొప్పున వర్షపాతం నమోదైంది.
